Feb 13, (2013 (QOL) Wararka naga soo gaadhaya Magaalada Muqdisho ee Caasimada Dalka Soomaaliya ayaa sheegaya inuu Maanta Magaaladaasi Muqdisho ku geeriyooday Gudoomiyahii Ururka Ahlu-Sunna Waljameeca ee Gobolada dhexe ee Soomaaliya ka dagaalama Alle ha u naxariistee Sheekh Maxamed Yuusuf Xeefoow kadib xanuun kadis ah oo habeenkii hore ku soo booday.

Wasiirka Arrimaha Gudaha iyo Amniga Qaranka Soomaaliya Mudane C/kariim Xuseen Guuleed ayaa Shacabka Soomaaliyeed uga tacsiyeey Geerida ku timid Gudoomiye Sheekh Maxamed Yuusuf Xeefoow Gudomiyahii Ururka ASWJ.

Wasiirka Arrimaha Gudaha iyo Amniga Qaranka Mudane C/kariim Xussein ayaa intaasi ku daray in Gudoomiyaha xalay geeriyooday Sheekh Maxamed Xeefoow uu qabtay xanuun kadis ah Kaas oo sababay inuu si dhakhso ah u geeriyoodo Gudoomiyahu.

Mudane C/kariim Xusseen Guuleed oo Warbaahinta Dowlada la hadlayay ayaa sheegay in markuu xanuunsaday Sheekhu uu Madaxweynaha Jamhuuriyadda Soomaaliya Xassan Sheekh Maxamuud Amar ku bixiyay in si deg-deg ah Caafimaad dalka dibadiisa ah loogu diro Gudoomiyaha balse Diyaaradii qaadi lahayd oo dhexda kusoo jirta uu Marxuumku Geeriyooday.

Isku soowada Uruuriyoo Wasiirka Arrimaha Gudaha iyo Amniga Qaranka Soomaaliya ayaa waxa uu Tacsi tiiraanyo leh u diray Eheladii iyo Guud ahaan Shacabka Soomaaliyeed ee uu ka baxay Alle ha u naxariistee Sheekh Maxamed Yuusuf Xeefoow oo ahaa Gudoomiyahii Urur Diimeedka Ahlu-sunna Waljameeca ee dalka Soomaaliya, waxuuna wasiirku tilmaamay inuu marxuumku ahaa nin aad u wanaagsan oo Soomaali oo dhan kabaxay lana tabi doono.

Noor Mohamed
Qorahay Media
qorahay99@yahoo.com