Feb 19, (2013 (QOL) Waxaa Suuqyada Dalka Soomaaliya gaar ahaan kuwa Gobolada Jubbada Hoose iyo Banaadir waayadan dambe maalinba maalinta ka dambaysa hoos u sii dhacayay Sarifka Lacagaha qalaad sida Shiling Kenyanka iyo Dollar-ka ( USA ) taas oo macnaheedu yahay inuu kor u kac weyn ku yimid Lacagta Shiling Soomaaliga ah ee Dalka.

Hadaan ku horeyno Suuqa Magaalada Dhoobleey ee Dhacda Xuduuda Dalalka Soomaaliya iyo Kenya waxuu Kunka Shilin ee Kenya ( 1000 ) Maalmahan ka marayaa gacantiisa hore labo boqol oo kun oo Shilinka Soomaaliya ah ( 200,000 ) halka gacanta dambe lagu kala gadanayo laba boqol iyo toban kun oo Soomaali ah ( 210,000 ) Todobaadkii aynu soo dhaafnay Kunka Kenya waxuu Suuqa Magaalada Dhoobleey ka marayay gacanta hore labo boqol iyo sideetan kun oo Soomaali ah (280,000) halka Gacanta dambe uu ka marayay Sadex boqol oo kun oo Soomaali ah (300,000).

Dhanka lacagta Maraykanka Boqolka Dollar ( $100 ) ayaa Gacanta hore haatan waxuu Magaalooyinka Dhoobleey iyo Kismaayo ka yahay hal Malyan iyo Lix boqol oo kun oo Soomaali ah ( 1,600,000 ) halka gacanta dambe lakala siisanayo hal Malyan, Lix boqol iyo Konton kun oo Soomaali ah ( 1,650,000 ) Todobaadkii hore ayaa waxaa Boqolka Dollar lagu Sarifayay Suuqa Magaalada Dhoobleey Labo Malyan laba Boqol iyo Sideetan kun oo Shilin Soomaali ah illaa Laba Malyan iyo Sadex Boqol oo Shilin Soomaali ah ( 2,280,000-2,300,000 ) waxaanad dareemaysaa inuu Sarifku Todobaadkan hoos u dhacay qiimo dhan Lix boqol iyo Sideetan kun Illaa Todoba boqol oo kun oo Shilin Soomaali ah ( 680,000-700,000 ).

Hadaan fiirino Magaalada Muqdisho ee Caasimada Dalka sidan oo kale ayuu Sarifka Dollarku dhulka u yaalaa arrintaas oo aan lagaran karin waxa sababay iyadoo dhanka kale ay Maciishadiina Sare u kacday taas oo aan sina isku waafaqi karayn in Sarifkiina Dhulka tago Qiimahii Maciishaduna Cirka tago.

Noor Mohamed
Qorahay Media
qorahay99@yahoo.com