Dec 6, 2012 (QOL) Warar naga soo gaadhay Magaalada Jigjiga ayaa sheegaya Ahmed Sheikh oo kamid ah adeegayaasha gumaysiga Itoobiya ee dhibaataynta shacabka Ogaadeenya loo wakiishay in guri uu Addis Ababa ka habeen hore lagu weeraray.

Ahmed Sheikh ayay in mudo ah Abdi Iley (UBO) isku dhacsanaayeen wuxuuna dibada ka joogay guud ahaan Siyaasada Itoobiya loogu adeegayo, bishii la soo dhaafay ayuu Ahmed Sheikh gudaha Addis Ababa ku laabtay kana ambabaxay Nairobi oo uu mudo ku sugnaa kadib markii ay qaar Saraakiisha Gumaysiga ka ka tirsani ku wargaliyeen in Abdi UBO xilka laga qaadayo isagana loo magacaabayo.

Ahmed Sheikh ayay u suura gali weyday in uu Magaalada Adiss Ababa uga gudbo Ogaadeenya cabsi uu ka qabo in uu Abdi UBO xabsiga u taxaabo darteed waxaana la sheegayaa in uu ku dhuumaleysanayay xarunta gumaysiga ee Magalada Addis Ababa.

Hadaba sida ay wararku nagu soo gaadhayaan habeen hore ayaa Ahmed Sheikh gurigii uu Addis-Ababa ka daganaa la weerar waxaana la tuhun sanyahay in uu weerarkaas Abdi UBO qorsheeyay, wararku waxay intaas ku darayaan xiliga weerarkaasu dhacayay in uu Ahmed Sheikh ka maqna.

Sida ay ilo xog ogaal ah Qorahay Media u sheegeen ciidamdii falkaas fuliyay waxay dhibaatooyin kala duwan u gaysteen xaaskii Ahmed Sheikh & labo wiil oo la sheegay in ay isaga & xaaaskiisa lakala dhasheen, ciidankii weerarkan qaaday waxay halkaas ka afduubeen labadii wiil halka ay gabdhiina iyadoo jidh dilan ka tageen.

Dhanka kale ilo lagu kalsoonyahay ayaa sheegaya in Ibraahim Dheere Saraakiisha Tigreegu u magacaabeen lataliyaha Abdi UBO, Ibrahim Dheere oo aysan mudooyinkii dambe isaga & Abdi UBO waxaba u kala madhnayn kana soo muuqday shaashadaha la iska arko ayay Tigreegu aad ugu amaaneen ka qayb qaadashadii & abaabulkii xooganaa ee uu ka galay kulan ceebeedkii Miyor-Daboool ee bulshada Soomaalida Ogaadeenya qaybaheeda kala duwan lagu bahdilay sida weyna loogu dhaawacay sharafta umada muslimiinta ah ee lagu yaqaano dhaqanka, asluubta & diinta Islaamka ee muqadaska ah.

Dad ka agdhaw Abdi UBO ayaa laga soo xigtay in dhoolo cadayntii Ibrahim Dheere ee laga arkayay maadshii kulankii Miyor-Daboool ka dhacayay ay saraakiisha gumaysigu aad ula dheceen taasina ay keentay in ay xoogaysato kalsoonidii aan lugaha adag ku taagnayn ee ay Ibrahim Dheere ku qabeen sidaas darteed ayaa la sheeagyaa in lagu maamuusay in uu noqdo la taliyaha Abdi UBO madaama la hubiyay in uusan damiir ku dhaamin uuna ka qayb qaadan karo falalka wax dhimaalka weyn umada Soomaalida Ogaadeenya ku ah.

Wararkaas & guud ahaan arimaha kala duwan ee Ogaadeenya khuseeya wixii ka soo kordha dib ayaan ka soo gudbin doonaa Insha Allaah.

Qorahay Media
qorahay99@yahoo.com