Heesta Damac

Aug 15, 2011 (QOL) Qormadeena Duljoogso ee Todobaadkan waxaynu ku eegaynaa cinwaanka sare oo ah Marti xog la'aantaan ku nacaye shidaalka Ogaadeenya ee lagu qamaamayo soo saaristiisu yay ka go'daa?.

Waxaa maalmahan aad loo hadal hayaa arimo ku saabsan heshiis dhex maray xukuumada Itoobiya, Dawladda China & Maamulka Siilaanyo hesheeskaas oo sheegaya in shidaalka ka buuxa Ogaadeenya laga dhoofiyo qaybo kamid ah dalka Soomaaliya gaar ahaan Gobolada Waqooyi Galbeed, arintaas oo warbaahintu siyaabo kala duwan uga hadleen oo ay qarkood shegeen in laga dhoofinayo Dakadda Magaalada Berbera ee W/Galbeed oo aad modiid in ay ku jirto laab-lakac aan salka dhulka ku haynin.

Marka hore aan is waydiino shidaalka laga hadlayo halka uu ku yaalo cida ilaa hadda gacanta ku haysa & sababaha loo is tocmaali la'yahay.

Dhulka Ogaadeenya waa dhul dihin oo uu Allaah ku manastay khayraad aan la qiyaaasi karin sida Xoolaha, Macdanta, Shidaalka, iwm kuwaas oo quwado badan oo aduunka ah damaaci uu ka galay sidii loo soo saari lahaa balse damaca waalan ee shisheeyaha waxaa hor taagan oo in khayraadka Ogaadeenya la boobo diidan Ciidanka Waddaniga Xoraynta Ogaadeenya oo u dagaalamaya Xoreynta Ogaadeenya shacabka Ogaadeenya oo kaashanaya iskuna aaminay awooda culus ee CWXO hadaba 30 kii sano ee u dambeeyay waxaa Ogaadeenya tagay shirkado aad u badan kuwaas oo mid waliba ay doonaysay in ay soo saarto Shidaalka Ogaadeenya waxaana marwalba fashilinayay shacabka la gumaysto ee Ogaadeenya oo gaadhka ka haya marnabana aan ogolaanaynin khayraadkooda in xoog lagu soo saaro kadibna iyaga dib loogu gumaado waxaana in badan dhacday gacan kahadal iyadoo ay arintaas darteed dad shisheeye ah u dhintee Ogaadeenya dhexdeedana lagu weeraray shirkado boob doon ahaa.

Xukuumada Itoobiya ee damaca waalan ku caan baxday waxay mudooyinkii dambe aad u suuq gaynaysay sidii ay heshiis ula gali lahayd shirkado uu hunguri kaga jiro shidaalka Ogaadeenya kuwaas oo aad u quudaraynaya kuna ag wareegaya been faro badana lagu soo xero galiyo marka dambana ogaada xaqiiqada ka jirta Ogaadeenya & in aysan shacabka Ogaadeenya ogolayn in dhulkooda sidii la doono laga yeelo Xoreynta Ogaadeenya halyeeyo aad loo jeclaa ay u naf waayeen kuwana wali diyaar u yihiin difaacida sharafta shacabka Soomalidda Ogaadeenya & khayraadka Ogaadeenya ceegaage ee dadkii xaqa u lahaa ka sooman yahay.

Waxaa maalmahan aad loo buun-buuninayaa heshiis la leeyahay waa 3 geesood ah soo shaac baxay kadib markii Addis Ababa uu ka dagay wafdi uu Siilaanyo hogaaminayay halkaasna uu heshiis kula sixiixday gumasiga Itoobiya & shirkad cusub oo Chinese ah oo lagu magacaabo PetroTrans Company Ltd oo baryaha la shaaciyay in ay la wareegtay Shidaalka Ogaadeenya waa su’aal ee Siilaanyo yaa wakiil uga dhigay Ogaadeenya oo in uu sixiixo yaa u ogolaaday.

Sidoo kale waxaa iyana la sheegayaa in uu dhiigyacab Males Safar la xidhiidha arintan ku gaadhay China Madaxwaynaha Chinana la qaatay kulan rasmi ah sida ay qortay wakaalada wararka ee China halkan ka Akhri Chinese president: China to send food aid to Ethiopia as soon as ... Waxaa iyana hore laga sii waday Wafdigii Siilanyo hogaaminayay oo uu gacanta wado Males ilaa haddana sida ay saxaafadu sheegayso waxaa lagu wadaa in uu heshiis riyo ah dhex maro xafladna loo dhigo.

Arimahaas oo dhan marka la fiiriyo maskaxada ku soo dhacaya sheeko dhex martay nin aqoon yahan ah oo Ogaadeenya u dhashay una shaqeeya UNta & Nin Itoobiyaan ah oo isna aqoonyahan ah, sheekadaasu waxay u dhcaday ninka Itoobiyanka ah ayaa aad wuxuu uga calaacalay oo u sheegay hadii ay ONLF dagaalka joo-jin lahayd in uu noqon lahaa Milion-neer ninkii Ogaadeenya u dhashay ayaa yidhi oo yaa hor-taagan arintaas wuxuu ku yidhi ONLF ayaa diidan in la soo saaro khayraadkaas waxayna leeyihiin ilaa aan xorowno ma soo saarayno khayraadka, ninkii Ogaadeenya u dhashay ayaa intuu is xanaajiyay yidhi aniga ayaa soo dhamaynaya wuxuuna la kulmay Mas'uuliyiin madaxda ONLF ka mid ah waxayna u sheegeen in aan shidaalka Ogaadeenya cid aan shacabka iska leh ayahni ka go'aan gaadhi karin shacabka Ogaadeenyana uusan madaxbanaani & ikhayaar haysanin sidaas daraadeedna aan khayraadka Ogaadeenya la fadhataysan karin, sidii ayuu ugu celiyay ninkii Itoobiyaanka ahaa oo u sheegay ONLF heshiis ay shirkadaahas la gasho moyaane in ay adag tahay in khayraadka Ogaadeenya ay cidi farta saarto, arintaasina waa mid ay cid waliba ka dharagsantahay.

Tusaalaha kale ee aan u soo qaadanayno arintan ayaa waxay tahay Meles wuu ka adag yahay Soomaaliya oo waxaan manta ku tilmaami karnaa in uu Soomaaliya maamulo hadalna aan lagu soo celin karin waxaanan ognahay dakada Berbera in ay Itoobiya 14 kii sano ee u dambeeyay maamulaysay oo ay hubka kala soo dagaysay hadii ay Riyadii Itoobiya halkaas gashay waa mid aan lala yaabaynin lakiin ONLF Itoobiya way ka adag tahay, Itoobiya bilo ka hor ayay xidhay TV Somalichannel iyada oo Itoobiya u sheegtay mulkiilayashi amarna ku siisay in ay joojiyaan barnaamijka Ilays ee ka baxi jiray TVga Somalichannel halkaas ayaana lagu joojiyay lakiin ONLF kor ayay u dalacday faadiido ayayna ka qaaday oo Barnaamijak Ilays maalin kasta oo Arbaca ah waxaa si toos ah looga daawadaa TV Eretria oo aad uga aood badan kii horay looga daawan jiray kolkaa saw macnaheedu maha in ONLF ay gumysiga ka awood balaadhantahya korna ay u dalacday.

Markaan isku soo uruurino arimahan ay saxaafaduhu qorayaan waxaan ku tilmaami karaa Qarow Soojeed waa qof jiifa oo hadana ku riyoonaya in shidaalka Ogaadeenya laga dhoofiyo Berbera miyuu dhamaaday shacbkii lahaa ee boqolaalka sano gumaysiga khayraadka ka hortaagnaa? kuwa heshiiska damac habawsan gumaysiga la galayaa miyay iloobeen wixii Cobole ka dhacay miyaysan warba ka haynin awooda Ogaadeenya sida dhabta ah wax ugu muquunin kartaayi in ay ONLF tahay oo aysan Milatariga Itoobiya goobaha shidaalka Ogaadeenya lagu tuhmayo habeen ku baryi karin sidoo kalena aysan xeryaha magaalooyinka waawayn uga oodan ka bixi karin.

Gabgabada & xikmada qormadu waxaa weeye Marti xog la'aantaan ku nacay alla yaa miyirsada yidhaahda qolayaha miyir la'aanta ku dhaqaqaya waxaa hubaal ah in aysan riyadu meelna gaadhaynin shidaalka & khayraadka faraha badan ee Ogaadeenya ceegagaana wax la xado oo meel tuubo laga gashado laguna nuugo wuu ka weynyahay dadkii lahaa oo aan ogolaanina cid ka faa'iidaysan kartaa ma jirto.

Qaybaha dambe ee Qormada la soco hadii uu Alle idmo

Qorhaya Online
qorahay99@yahoo.com

   
Contact: qorahay99@yahoo.com
Copyright © 1999 - 2009, All rights reserved. Qorahay Online