Qormada Duljoogso: Shacabka Ogaadeenya maanta gumaysiga Itoobiya maka lumin karaa fursada dahabiga ah miyuuse ka leexin karaa wadada ay cagta saareen ee xaqa ah?.

Jun 18, 2010 (QOL) Qormadeena Duljoogo ee todobaadkan oo Cinwaankeedu yahay Shacabka Ogaadeenya maanta gumaysiga Itoobiya maka lumin karaa fursada dahabiga ah miyuuse ka leexin karaa wadada ay cagta saareen ee xaqa ah? waxaan ku eegi doonaa waayo aragnimada shacabka Ogaadeenya & aqoonta ay u leeyihiin gumaysiga Itoobiya & hadba kuwa uu ku adeegto una jajaban fulinta danaha gumaysiga.

Sida la ogayahay shacabka Ogaadeenya oo mudo dheer la soo gumaysanayay waxay waligood gumaysiga kala hor jeedeen diidmo qayaxan oo waliba xoog badan waxaana gumaysiga marna u soorto gali weyday in shacabka Ogaadeenya si qasab ah lagu ogolaysiiyo adoonsiga oo ah meeqaan aan ruux Aadame ah loogu talo galin in uu Aadame kale ka ogolaado.

Sidaas daraadeed gumaysiga Itoobiya oo shacabka Ogaadeenya laylyi kari waayay waxaa xiligan lagula jiraa halgan aad u xoog badan oo ka dhashay diidmada xaqa ah ee shacabka Soomaalida Ogaadeenya halgankaas oo marxalado & Jabhaddo kala duwan soo maray waxaa maanta hor muud u ah Jabhadda Waddaniga Xoreynta Ogaadeenya (JWXO) oo ku tiirsan awooda Allaah sidoo kalena kaashanaysa shacabka ay ka soo dhex baxday ee geesinimada & g'aan adayga leh.

Halganka xaqa ah ee Ogaadeenya lagu xoreynayo waxaa go'aansaday shacabka Ogaadeenya wuxuuna maanta marayaa marxaladii ugu dambaysay ee guusha ay shacabka Ogaadeenya higsanayaan lagu gaadhi lahaa waana mid aan hakanaynin ilaa ay laga gun gaadho rabitaanka shacabka Ogaadeenya, dhinaca kale waxay shacabka Ogaadeenya waayo arag u yihiin aqoon fiicana u leeyihiiin tabaha & xeeladaha gumaysiga waxayna shacabka Ogaadeenya ogyihiin in uusan gumaystuhu marnaba si sahal ah ku dhiibaynin xoriyada dadka & dalka Ogaadeenya ee uu gumaysto waxayna dantu qasab ka digaysaa in xoriyada Ogaadeenya loo maro dhibaato & xanuun badan sidoo kale shacabka Ogaadeenya waxay u soo joogeen marar faro badan oo gumaysigu kuwo dabo dhilif u ah uu bulshada Ogaadeenya fariimo & dhambaalo erayga Nabad xambaarsan ugu soo dhiibay kadibna dadka shacabka ah ee aan dambi galin lagu xasuuqay.

Gumaysiga Absiiniya ee boobka & dulmiga ku can baxay waxaa ka go'an in uu shacabka gumaysi diidka ah ee Ogaadeenya hadba tab cusub ku maaweeliyo wuxuuna xiligan oo ay wado waliba ka soo oodantay isku dayayaa in uu bulshada Ogaadeenya been & Dhaan Dabangaale ku jaho wareeriyo, gumaysigu wuxuu ku soo guul daraystay isku dayo faro badan oo uu mudo soo maleegayay wuxuuna in badan isku dhabar jabiyay in uu bulshada Soomaalida Ogaadeenay ku kala sheego magacyo isugu jira ururo & hayb ama qabiil oo inta badan ah meesha ay dadka Soomaaliyeed oo dhani u dhago nugulyihiin isagoo u jeedadiisu tahay in uu iska horkeeno dadka uu gumaysto si ay dhexdooda isugu mashquulaan dhamaan tabihii gumaysiguna waxay ku dhamaadeen fashil.

Gumaysiga Itoobiya ma quustee isagoo adeegsanaya shaqsiyaad u hogaansamay oo ka mid ah dadka Ogaadeenya ee dulman wuxuu baryahan aad isugu mashquuliyay aadna loo xar xardhayaa erayga Nabad oo ah shayga ay umada Ogaadeenya doonayaan una dagaalamayaan ee naf & maalba loo hurayo balse aan si sahal ah dhanka gumaysiga uga imaan karin dhabna ka ahayn.

Labadii bilood ee u dambeeyay waxaa si aad ah u socotay dabayl xoog leh & qiiq lagu qarinayo dulmiga gaamuray ee shacabka Ogaadeenya saaran waxaana dhawrkii todobaad ee tagay oo ay dabayshaasi socotay Ogaadeenya ka dhacay xasuuqii ugu badnaa iyadoo meelo kala duwan oo dhulka Ogaadeenya ka mid ah lagu laayay dad shacab ah oo aan waxba galabsanin meelo badan lagu xidh xidhay shacab aan waxba dhimin qaarna laag baro kiciyaya deegaanadoodii wuxuuna dhiiga shacabka Ogaadeenay duraabaya laagihii ay xareedu duraabi jirtay.

Hadaba waxaa is weydiin mudan 10 su'aalood oo ah.

1-Nabada la sheegayo ma xasuuqa shacabka Ogaadeenya loola jeedaa?
2-Ma waxaa loola jeedaa wixii aad qarniyada diidanayd ogolow?
3-Ma waxaa loola jeedaa qolada Ibrahim Dheere ee xerootaya ayaa la nabad galinayaa?
4-Dhiiga shacabka ee laaga duraabay ma waxaa lagu soorayaa dadka naqa aan bushada kale aga u guuray?
5-Maxaa iska badalay dulmigii & adoonsigii ay shacabka Ogaadeenya ka dagaalamayeen?
6- Maxaa iska badalay baro kicintii & gubidii guryaha & hantida dadweynaha?
7-Maxaa iska badalay garicii & silicdilkii maatida & nugulka aan awooda lahayn?
8-Mawxaaan ogolaanaa in inagoo awood leh aan is xabaalono wixii aan wax walba u hurnayna uu ceel ku dhaco?
9-Mawaxaan luminaa fursada dahabiga ah & awooda uu Illaah ina siiyay?
10-Ma meeshii aynu 30 sano oo xoog ah kaga soo gudubnay ayaynu dib ugu guuraa mise nasiirkeena ayanu shaqsiyaad danahooda ilaashanaya u dayacnaa?

Anagoo jawaabaha su'aalahan shacabka Ogaadeenya & akhristeyaasha Warbaahinta Qorahay Online u daynayna waxaanu hadalka ku soo gunaanadaynaa halganka Ogaadeenya ka socda waxaa wada shacabka Ogaadeenya oo xal kale uusan u muuqanin xog ogaalna u ah arimaha Ogaadeenya ka socda & huu haada ay gumaysiga & inta baaqiisa beenta ah u dhego nuglaatay wadaan, shacabka Ogaadeenyana aqoon & waayo aragnimo ku filan gumaysiga way ka haystaan xiligana lagama lumin karo wadada ay cagta saareen ee xaqa aha cidii iyadu door bida in ay duliga ku raali noqoto shacabka Ogaadeenya ma matasho riwaayadna kuma masquulin karto umada hayaanka ah.

Shacabka Ogaadeenya wuxuu u oomanyahay xoriyad aan dhiig daata mooyee wax kale in lagu helo rajo laga qabin waxaana xoraynta diinta & sharafta dadka & dalka Ogaadeenya si dhab ah ugu istaagay shacabkuna ku qanacsanyahay JWXO oo ka run sheegaysa hadafkeeda siyaasadeed isla markaasna aan u liicaynin duruufaha is badbadalaya sidoo kale aan xeerinaynin wax aan masalxada umada Ogaadeenya ahayn waxaana Illah mahadii ah in ay shacabka Ogaadeenya ku faanayaan awooda tiro & tayaba ah ee Ciidanka Waddaniga Xoreynta Ogaadeenya oo ah cududa luxdan ee kaga dhawaajisay & kuwa u habraday xabada laysaga dhigo, shacabka Ogaadeenya waxay aaminsan yihiin awooda Illahay waxayna ku niyad sanyihiin qoriga Gabdhaha & Wiilsha geesiyaasha ah ee CWXO ay ku quus galiyeen damicii & riyadii gumaysiga soo jireenka ah ee Abasiiniya.

Qormadeena Duljoogso ee todobaadkan maanta halkaas ayaan ku hakinaynaa lasoco qaybaha dambe.

Qormooyinkii hore Halkan ka booqo.

   
Contact: qorahay99@yahoo.com
Copyright © 1999 - 2009, All rights reserved. Qorahay Online