Qormada Duljoogso:Maxaabiista Ogaadeenya lagu bahdilayo oo loo isticmaalayo sida meelaha Xayawaanka ee loo daawasho tago (Zoo)

March 1, 2010 (QOL) Noolaha sankuneeflaha ah wuxuu u kala baxaa Bani Aadam & Xayawaan, wuxuuna Illaah caqli & garaad siiyay bani aadamanka waxaana lawada qirayaa in uu Bani Aadamku yahay waxa ugu fadilan ee uu Allah siiyay caqli & gaarad. Xayawaanku waa noole uu Allaah ugu tala galay in lagu manaafacaasado sida Hilibka, Caanaha, Rarka iwm. Markaad fiiriso wadamada hormaray waxaad arkayso sida loo xanaaneeyo Xayawaanka waxay leeyihiin Isbitaalo & daawooyin u gaar ah oo lagu xanaabeeyo xoolaha & Xayawaanka kaleba, waxaa kale oo ay leeyihiin meelo xayawaanka loogu jimciyo ama loogu maydho.

Hadii aan u soo noqdo cinwaanka qormadeena maanta waxaa Ogaadeenya ku habsaday gumaysi mudo aad u badan saaraa, shacabka Soomaalida Ogaadeenya waxaa laga gooyay dhamaan nolasha uu qofka Bani Aadamka ah & Xayawaanka aan xusnay ay ku noolaan lahaayeen, waxaa Ogaadeenya ka jira xabsiyo aad u badan oo lagu xidho shacabaka Soomaalida Ogaadeenya waxaa xabsiyadaas ku jira waalid da'ah oo mudo dheer ku jiray xabsiga waxaa ku jira Gabdho yar-yar oo intay ciidanka Tigreegu soo kufsadeen hadana loo taxaabay xabsi lagu ciqaabo, waxaa ku jira kuwa ku umulay oo caruurtii ay xabsiga ku dhaleen dad socda oo aan meel kale aduunka arkin ay yihiin waxaa caruurtaas magac looga dhigay Xabsi, Xabsiyada Ogaadeenya waxaa kujira dad xoolo dhaqato ahaa oo aan waligood magaalo arkin meeshii ugu horaysay ee lageeyayna ay noqotay Xabisga loo yaqaano Jeel Ogaadeen.

Majito cid og oo lasocota xadgudubyada dhabta ah ee maalin & habeenba lagu hayo Maxaabiistaan, wuxuu Gumaysiga Itoobiya amray kuwa dabadhilifka ah ee u shaqeeya oo uu kamid yahay ninka dhiiga dadkiisa ku naaxay Abdi Ilay oo lagu qiyaasayo in uu laayay 8000 oo shacab ah ilaa 18000 ugu jiraan Xabsiyada. Dadka u xidhan gumaysiga Itoobiya ee uu Ina Ilay Xabsiyada ku ciqaabo waxaa loo didaa in ay ehelkooda soo boqdaan waxaana lagu hayaa meel hog ah oo ay daris yihiin kutaanka & cayayaanka caanka ku ah Xabsiyada Itoobiya ay samaysatay mana helaan wax daryeel ah dadkaas u xidhan Itoobiya.

Waxaa xusud mudan mudo dheer ayuu Ina Ilay saxaafada ka sheegayay in ay hormar sameyeen wuxuuna u gacan haadiyay kuwo markii horeba la shaqaynayay oo la qabsan waayay Nolasha Qurbaha oo ku cago gubyooday dhimbiilaha kulul ee ay saydhayaan Jaaliyaddaha Soomaalida Ogaadeenya oo baryahan dambe si xoog ah u soo gudbinayay tacadiyada shacabka Soomaalida Ogaadeenya lagu hayo sida lawada ogyahay dhawr jeer ayay Itoobiya isku dayday in ay kacdoonka Jaaliyadaha Soomaalida Ogaadeenya is hor taagto waxayna marar kala duwan hindistay in ay dabo dhilifkeeda hawl galiso dhamaan arimahaasina fashil ayay ku dambeeyeen waxayna Itoobia xaqiiqsatay in aan si sahal ah Jaaliyaddaha Soomaalida Ogaadeenya lagu dhex gali karin waxaana si rasmi ah Itoobiya isku daygeedii dibada u fashiliyay Safarkii madalufiska ahaa ee uu Ina Ilay Lodon ku tagay safarkaas oo ay Itoobiya qoomamayso wuxuu ku ekaa Safaarada uu Gumaysigu halkaas ku leeyahay waxaana Ina Ilay la kulmay intii nolosha qurbaha & ku dhex jirka Jaaliyadahaba ka quusatay ee loo yaqaano Daboqoodhiga Doolka ah.

Gumaysiga oo taariikh ahaan aan waligii gar qaadanin isla markaas aan quusanin wuxuu u adkaysan la,yahay dhawaaqa dheer ee shacabka Soomaalida Ogaadeenya ee gudo & dibadba is qabsaday waxaana soo kartay dhaleecaynta caalamku uu ku dhaleecaynayo ku tumashada Xuquuqul Insaanka, sidaas daraadeed wuxuu gumaysigu taaganyahay odhaahdii Soomaaliyeed ee ahayd Dameer ceel ku dhacay kooykooyna waa lagu dayaa wuxuuna baryahan dambe bilaabay qorsheyaw cusub oo indhaha Jaaliyaddaha Soomaalida Ogaadeenya & caalamka lagu cawirayo wuxuuna abaabulay koox isku xidhan oo Daboqoodhiga Doolka ah kuwaas oo sameeyay TV ay Itoobiya fangaraysa oo ay ula bexeen JigJiga TV kaas oo cariga Maraykanka laga daawado isla markaasna ay gacanta ku hayaan shaqisyaad ay Itoobiya mudo dheer tabobaraysay waxaana ka mid ah sawiradan hoos ka muuqda.

Daboqoodhiga Doolka ah waxaa looga yeedhay JigJiga waxaana lagu marti qaaday hilbaha Maxaabiista Soomaalida Ogaadeenya ee uu Ina Ilay ku naaxay waxaana la geeyay Xabsiyo kala duwan oo ku yaala magaalada JigJiga kaas oo dhamaan Maxaabiistii intii la soo uruuriyay lagu yidhi noo dhaanteeya waa arin ugub ah oo aan aduunka horay uga dhicin Maxaabiis lagu qasbayo in ay ciyaaro soo bandhigaan sidoo kalana ay sawir fiican ka bixiyaan qaabka loola dhaqmo ayna qariyaan waxyeelada loo gaysanayo maalin & habeen waxaa wax lala yaabo noqotay Dabaqoodhigii Doolka ah in ay dad Xabsi ku jira ku yidhaahdaan farxad noo muujiya si aanu idiinka duubno waraysiyo qasab ahna ay ka qaadaan iyagoo u jeedadoodu tahay in ay cajaladahaas dibada u soo safriyaan ayna Jaaliyaddaha Soomaalida Ogaadeenya u tusaan in aan wax dhib ah Maxaabiista loo gaysanin.

Arintan oo ka mid ah hindise yaasha cusub ee Gumaysiga Itoobiya ayaa aad uga yaabisay cid kasta oo ka war heshay waxaad ka arkaysaan oo sawirada ku jira Abdinuur Mohamed Soyaan oo sanadkii 2008 ay Maamulka W/Bari Soomaaliya u gacan galiyeen gumaysiga Itoobiya.

Maxaabiistas lagu qasabayo in ay dhaanteyaan laguna dulciyaaro waxaa la qorshaynayay in mudo ah waxaana loo wakiishay Ina Ilay oo la hubiyay in uu yahay damiir laawe aan wax uu dhawranayaayi jirin calooshiisana la caqli ah & niman dhalasho Maraykan ah haysta oo dambigii ugu cuslaa dhabarka saartay waxayna la mid yihiin cadowga ay Maxaabiistaasi u xero oodanyihiin ee dulmiga ku haysta kuna ciqaabaya Xabsiyada darxumadu taalo.

Waxaan Jaaliyadaha Soomaalida Ogaadeenya ee Maraykanka ku nool u sheegaynaa in nimankaas ay maxkamad soo taagan waana arin waajib in lagula xisaabtamo Maxaabiista ay ku qasbeen in ay u dhaanteeyaan ayna waraysiyo been ah ka qaadaan ayna qariyaan xadgudubka loo gaysto

Akhristoow Qormadeena Duljoogso ee todobaadkan maanta halkaas ayaan ku hakinaynaa lasoco qaybaha dambe.

Qorahay Online

   
Contact: qorahay99@yahoo.com
Copyright © 1999 - 2009, All rights reserved. Qorahay Online