Jan 2, (2013 (QOL) Marka hore waxaan halkan ka salaamaynaa dhamaan Akhristayaasha & Dhagaystayaasha warbaahinta Qorahay Media meel ay jogaanba waxaana leenahay sanad wanaagsan.

Qormadan waxaan ku eegaynaan wararka kutidhi kuteenka ah ee Gumaystaha Itoobiya & gacanyareyaashiisu ay sheegayaan ee ah waxaa la dilay halyayga weyn ee Ogaadeenya Naftii Hure Sheikh Deeq oo gumaystaha Itoobiya falaadh ku qotonta ku noqday, Allah ha xafido hana cezeeyee Sheikh Deeq wuxuu kamid yahay dadka u istaagay in ay ciidda Ogaadeenya ka xoreeyaan gumaysiga soo daashaday ee umadda Ogaadeenya mudada dheer soo dul saraa.

Shaki kuma jiro in uu gumaysigu ku qarwo rag uu ku jiro Sheikh Deeq maxaa yeelay waa halyay aan u nixin cadowga waana geesi umadiisa dhiigiisa u hibeeyay kuna talagalay in uu gayiga Ogaadeenya xorayntiisa u geeriyoodo ama uu umadiisa sharaf & gobanimo gaadhsiiyo.

Geesiyaasha uu Sheikh Deeq ka midka yahay waa halyeeyada u duur galoobay ee go'aansaday in ay gobanimo gaadhsiinta dadka & dalka Ogaadeenay u halis ay geeridu ugu weyntahay u galaan & cizi ku nolaadaan, Sheikh Deeq waa halyay saaxiibo badan oo garabkiisa ahaa waayay, waa halyay in badan ka talaabsaday isna dul saaray maydadaka askarta gumaysiga ee dool ah, waa halyay meesha lagu sheego cadowgu ka cararo aadna looga argagaxo, waa halyay umadiisu markay aragto aysan ilmadda ceshan karin farxadda & kalgacaylka ay u qabaan awadeed.

Sheikh Deeq waa halyay aan u nixin cadowga Itoobiya & kuwa uu darban ee adeegayaasha u ah dulinimadana ogolaaday, waa halyay kiciyay kumanaan kun oo Ogaadeenyaan ah, waa halyay dareenkiisu taagan yahay feejigan oo aan ku dhicin dabinada gumaysiga, waa halyay ay uu gumaysigu jeclaan lahaa in loo soo sheego geeridiisa balse waxaysan ogayn in uusan halgamaagu geerida nacbayn uuna ku talogalay, Sheikh Deeq waa halyay hurdo & raaxo ka caagay, waa halyay kala gooyay wadooyinka uu gumaysigu isaga goosho kuna qasbay in aysaan dhufyasyada ka bixin.

Markaan intaas ka gudibno waxaan jaleecaynaa wararka uu gumaysigu buufinayo kuna sheeganayo in Sheikh Deeq ay dileen, sida xaqiiqada ah inoona muuqata aad ayay u jeclaan lahaayeen geerida Sheikh Deeq balse waa war aan sal & raad toona lahayn isla markaasna waa war muujinaya walwalka & cabsida weyn ee uu ku hayo.

Hadaba waxaan shacabka gobanimo doonka ah ee Ogaadeenya meelay joogaanba ugu bishaaraynaynaa una xaqiijinaynaa in uusan Shekh Deeq waxaba qabin, mata ayaanu Sheikh Deeq la xidhiidhnay aad ayuuna ugu qoslay wuxuuna sheegay in ay beentaas maalin & habeenba ku qarwaan oo Wayaanihu uusan seexanin markii lagu sheego meel kamid ah gobalada Ogaadeenya sidaas awgeedna ay mooyadayaan in ay sheegashada beenta ah culaysa & cabsida kafujinayso.

Ma aha markii ugu horeysay ee ay dhahaan Sheikh Deeq waanu dilay dhamaan masuliyiinta JabhaddaWaddaniga Xoreynta Ogaadeenya ayayna marwalba been ka shegaan waana arin iska caadi ah ooay isku maaweelinayaan wax aan jirin oo ay askartooda daalan ee mooraalka jabsan wakhtiga adag ku dhaafiya is leeyihiin.

Warbaahinta Qorahay ayaa qiiman ku samaysay hadalka Abdi Ubbo ee ah in ay Sheikh Deeq waxaana cadaatay in uu warkani ka dhashay qaracanka gumaysiga & adeegheyaashiisa oo aad uga argagaxay jabka Todobaadkan oo kali ah soo gaadhay ee aysan waligood ka soo kaban doonin sidaas daraadeed waa in ay been aburaan oo ay isku maaweelinayaan waana mida keentay in ay beentaas soo bandhigaan.

Sheikh Deeq waa geesi shacabka Ogaadeenya balan la galay wuxuuna balankaasu ahaa guusha Xoriyada in uu gaadho ama uu geeri sharaf leh dhinto wuxuuna dhiman doonaa xiliga uu rabbigii khalqaday u qadaro qof walibana ajal ayuu leeyahay marka waxaan leenahay Sheikh Deeq wuu noolyahaye afka malagu dili karaa.

Islaan dhali weyday Aleelo ku waalatay gumaysinina been kama weynaado kamana gaboobo kamana quusto.

Qorahay Media
qorahay99@yahoo.com