|
Xuska sannad guuradii 13aad ee Qorahay Media iyo soo dhoweyntii Jaango ee San Diego Jan 8, (2013 (QOL) San Diego: Waxaa maalintii shalay ee taariikhdu ahyd bisha January 6, 2013 lagu qabtay magaalada San Diego ee gobolka California munaasabad lagu maamuusayo sannad guuradii 13aad ee saxaafadda Qorahay. Munaasabaddan ayaa waxaa kasoo qaybgalay dhamaan ururada bulshada ee Jaaliyadda Soomaalida Ogadenia ee San Diego, waxaana si khaas ah loogu marti qaaday fanaanka weyn halgame Maxamud Cabdi Cumar Jaango.
Xafladdan ayaa waxaa ka hadlay wariyaha Qorahay Media ee dalka mareykanka mudane Cabdirahman Hollywood oo isagu soo bandhigay taariikhda warbaahinta Qorahay iyo waliba marxaladiihii ay soo martay tan iyo markii la aasaasay. Ujeedaduna ahayd iney u adeegto isla markaana noqoto codka shacabka dulman. Tan iyo intii ay dhisneyd Qorahay Media waxay dunida dacaladeeda ka abuurtay wariyayaal iyo hawl-wadeeno taya leh. Kuwaas oo mar walba soo bandhiga barnaamijyo xiisa leh iyo waliba warar hufan. Waxaa kale oo uu wariyihu u mahad celiyey dhamaan wariyaasha iyo hawl-wadeenada Qorahay Media gaar ahaan agaasimaha Qorahay Media halgame Maxamed Ibrahim oo ah aasaasihii warbaahintan. Maxamed runtii wuxuu maal, muruq iyo masxba u huray sidii warbaahinta Qorahay dunida ugu soo bandhigi lahayd xasuuqa iyo tacadiyada uu gumeysiga Ethiopia ku hayo shacabka Soomaalida Ogadenia.
Waxaa kaloo goobta ka hadlay halgame Maxamud Cabdi Cumar Jaango oo isagu soo bandhigay gabay uu ku cabirayey dareenkiisa ku aadan saxaafadda Qorahay Media. Ugu dambeyn jaaliyadda Soomaalida Ogadenia ee San Diego ayaa iyagu dhamaanba hambalyo iyo bogaadin udiray bahda Qorahay Media isla markaana ku dhiiri galiyey ineysan waligood ka daalin hawsha ay u hayaan shacabkooda.
Video ga munaasabadan kol dhow kala soco qorahay media. |
Waxaa
isna goobta ka hadlay halgame Cabdullahi Cumar Feen oo isagu
ku hadlayey magaca ururka Odayada San Diego. Waxaana hadaladiisa
kamid ahaa “hadal kuma soo koobi karo waxa ay saxaafadda
Qorahay u qabtay umadda dulman ee Ogadenia, waxaana leenahay
Hambalyo! Hambalyo! guuleysta”
