Jan 27, (2013 (QOL) Wararka naga soo gaadhaya Caasimada Soomaaliya ee Muqdisho ayaa sheegaya Wariye Cabdicasiis Koronto oo Booliska Soomaaliya ee Muqdisho ka hawl gala ay todobaadkii hore xidheen in maanta loo dhaadhiciyay Xabsiga dhexe ee Muqdisho, Wariye Koronto ayaa la xidhay kadib waraysi uu ka qaaday Haweenay sheegtay in ay rag Ciidamada Booliska Soomaaliyeed ka tirsani faro xumeeyeen.

Wararku waxay intaas ku darayaan in aan wax maxkamad ah wariyaha la hor gaynin waxaana xadhiga Wariye Cabdicasiis Koronto aad uga cadhooday dhamaan Wariyaasha ka shaqeeya dalka Soomaaliya gaar ahaan kuwa ka hawl gala Magaalada Muqdisho, Saxafiyiintu waxay sheegeen in ay sharci daro tahay in qof aan Maxkamad la saarin loo dhaadhiciyo xabsiga dhexe.

Suxufiyiinta Soomaaliyeed ee Muqdisho ka hawl gala waxay Wasaarada Warfaafinta Dowlada dhexe ee Soomaaliya ka codsadeen in ay arinta Wariye C/Casiis Koronto wax ka qabato.

Noor Mohamed
Qorahay Media
qorahay99@yahoo.com