Nov 15, 2012 (QOL) Qormadeena Duljoogso ee Todobaadkan waxaynu ku eegaynaa cinwaanka sare oo Shacbka Magaalada Jigjiga oo ka cabanaya ciidamada gumaysiga & kuwa dhididdhawrka u ah oo maalmahan culays badan ku haya.

Magaalada Jigjiga ayaa la sheegaya in ay ka socoto mawjad si fudud isu badali karta, cabasho xoogan oo ka soo yeedhaysa shacabka Soomaalida Ogaadeenya ee Magaalada Jigjiga ku dhaqan ayaa muujinaysa diidmada shacabka & jujuubka ay gumaysiga & adeegayaashiisu ku hayaan.

Shacabka Jigjiga waxay aad uga cabanayaan culays faro badan oo ciidamada gumaysiga & adeegeyaashoodu ay saarayaan iyadoo dhulka Ogaadeenya guudahaan uu ku jiro xaalad gumaysi oo mudo dheer ragaadisay ayay dadka Jigjiga ku dhaqani aad uga cabanayaan in tan & geeridii Meles Zenawi ay gabagabo ku jiraan laguna jujuubayo isu soo baxyo aan rabitaankooda ahayn, sida ay dad shacab ah oo Jigjiga ku sugani Qorahay Media u sheegeen waxaa dadka lagu qasbayaa in ay soo xaadiraan shirarka khayaanada & hagardaamadooda lagu maleegayo.

"Subixii waxaan ku waa bariisanaa ciidamo guryaha ku xeeran kuwaas oo anagoon diyaar garoobin nagu qasba in aanu guryaha ka baxno una dareerno shirar aan wax dan ah noogu jirin oo lagaga hadlayo waxyaalo xaqiiqadaka fog waxaana markhaati nalooga dhigaa dhagarta naloo maleegayo" sidaas waxaa yidhi Oday ka mid ah shacabka Jigjiga.

"Waxaanu iska noqonay magac u yaal sababtoo ah xadgudubyo aanu aragno oo aanu kor taaganahay ayaa nalooga dhigaa wax aan dhicin, mararka qaarkood waxaan u maleeyaa in aan filim daawanayo waxaanan is arkaa anigoo mawjad hirar waaweyn leh dhex mukhuuranaya mawjadaaas oo ay harqinayaan kuwa shacabka ku dulnool ee u adeega taliska Itoobiya ee dhiig miiradka ah waxaa kale oo aan la yaabaa kuwa ka imaanaya meel ay xoriyad & dimuqriyadi ka jiraan ee marka ay Jigjiga yimaadaan meelaha la geeyo meel aan ahayn aan booqan karin hadana barwaqo ka sheekeeya" sidaasna waxaa yidhi mid kamid ah dhalinyarada Jigjiga ku nool.

Shacabka Jigjiga oo u badan dad danyar ah oo xoogsada waxaa lagu qasbaa kulamo & shirar is daba joog ah oo loogu talo galay in camiroyinka laga duubo lagana sii daayo TV-ga gumaysiga si indhaha caalmka loogu jao wareeriyo been aan jirin oo loo tuso in uu shacabku isugu yimaado shirar & isu soo baxyo gumaysiga lagu taageerayo.

Arintan borobagaandhada ah ee Itoobiya ay indhaha caalmka ku jaho wareerinayso ayaa si rasmi ah u bilaabatay kadib markii gumaysiga lagu eedeeyay cadaadiska bulshada rayidka ah oo ay Hayádaha xuquuqda aadamaha u doodaa si adag Itoobiya ugu dhaliileen waxayna Hayadahaasu sheegeen in ciidamada Itoobiya ay si aan gabasho lahayn ugu xad gudbaan dadka itaalka daran ee aan is difaaci karin.

Dadka Jigjiga ku dhaqan waxay sheegayaan in ay bilihii u dambeeyay la kulmayeen cadaadis xoogan oo ka duwan kii ay horey ula kulmi jireen kagana imanaya ciidamada gumaysiga & kuwa dhidid dhawrka u ah waxayna sheegeen in uu cidhiidhi galay qutulyoomka dad badan oo xoogsato ahaa kuwaas oo halkii ay suuqa uga xoogsi tagi lahaayeen lagu qasbayo in ay ka qayb galaan shirar & isu soo baxyo dadka shacabka ah lagu jujuubayo laguna ciqaabayo hadii aysan awaamiirta askarta gumaysiga fulinin.

Waxaa si aad ah loo handadaa Odayaasha, dhalinyarada & haweenka waxaana loogu hanjabaa hadii aysan hadba meesha looga yeedho soo xaadirin in ay la kulmayaan cawaaqib xumo aysan ka soo waaqsanin, Jigjiga waxay noqotay goob laga xayaysiiyo nolol dhoodhoob ah oo aan jirin waxayna aad uga muuqataa shaashadaha layska arko waxaase qarsoon xaqiiqada & oohinta aan kala joogsiga lahayn ee ka soo yeedhaysa dadka aan waxaba galabsanin ee sida bahalnimada ah Jeelasha loogu bahdilayo sidaas waxaa tidhi mid ka mid ah haweenka Jigjiga ku sugan oo dhawaan Jeel Ogaadeen ka soo baxaday.

Ugu dambayntii wiil dhalin yaro ah oo ka mid ah shacabka Jigjiga ee cabashada muujinaya ayaa isagoo dareenkiisa si xeel dheer ucabiraya wuxuu yidhi shacabka guud ahaan Ogaadeenya ku nool waxay ku jiraan iil madow oo aan cidi arag waxaana ku dul nool koox aan iimaan lahayn oo gumaysiga u hogaansantay kuwaas oo quluubtoodu ay doorsoontay.

Lasoco qaybaha dambe qormadeena

Qorahay Media
qorahay99@yahoo.com