Nov 30, 2012 (QOL) Ururka Midowga Dhalinyarada & Ardayda Ogaadeenya ama Ogaden Youth and Student Union (OYSU) faraca Galbedka Australia ayaa caawa shir qiimo badan Magalada Perth ku qabtay, shirkan oo ahaa mid kala warqaadasho & abaabul waxaa soo qabanqaabiyay Maamulka OYSU Perth waxaana marti ku ahaa kana qayb galay ka qaybgalay Gudoomiyaha OYSU Pacific Mudane Ahmed Ayuub oo Magaalada Perth safar gaaban ku jooga.

Shirka oo jawi aad u qurux badan ku bilowday waxaa ka soo qayb galay inta badan xubnaha & taageerayaasha OYSU Perth waxaana shirka lagu furay Aaydo Quráanka Kariimka ah & wacadi diini ah oo aad u qiimo badan oo uu jeediyay Allah ha xafidee Sheikh Abdulqadir Ali-Grey oo dhalinta ku guubaabiyay cabsida Alle & in ay u hagar baxaan ka qayb qaadashada halganka xaqa ah ee Ogaadeenya lagu xoreyno.

Wacdiga Sheikh Abdulqadir oo aad loogu qushuucay kadib waxaa shirka si rasmi ah u furtay Gudoomiye ku xigeenka OYSU Perth Marwo Nimco Sharif Mohumed oo dhamaan dadkii kulanka ka soo qayb galay u mahad celisay si gaar ahna u soo dhawaysay Gudoomiyaha Pacific-ga Mudane Ahmed Ayuub oo safar gaaban Perth ku yimid intaas kadib Marwo Nimco waxay hadalka ku wareejisay Xoghaynta guud ee Ururka OYSU ahna xubin ka mid ah Maamulka OYSU Pacific Mudane Jamaal Ugaas Xukun oo waxqabadka OYSU ka warbixiyay.

Mudane Jamaal wuxuu ka warbixiyay guud ahaan waxqabadka OYSU Perth wuxuuna ku dheeraaday muhiimada kulamada Dhalinyarada oo ah isku xidhka bulshada wuxuuna tilmaamay hawliha OYSU Perth wuxuuna sheegay in ay OYSU dardar galin horleh ku jiraan ayna kobcinayaan hawlaha ay umadooda u hayaan.

Kulanka waxaa goobjoog ka ahayd Abwaanad Marwo Rooda Ibrahim Abdi-Gurey hadal gaaban oo aad u miisaan culusna ka jeedisay, Marwo Rooda waxay dhalintana ku baraarujisay in ay kamidho dhaliyaan dadaalka la doonayo in dadka & dalka Ogaadeenya gumaysiga lagaga sifaynayo waxayna xustay in ay dhalintu tahay xooga maanta & maskaxda barito loona baahanyahay in la joogteeyo kulamada & isku xidhka dhalinyarada si loo helo waxqabad dhab ah & isku duubnaan joogto aha oo tayo sare leh arimahaas oo ay Abwaanadu tilmaantay in ay hawlaha halganka Ogaadeenya gun dhig u yihiin.

Kulankan oo ahaa mid aad muhiim ah waxaaa isna hadal aad u qiimo badan ka jeediyay Gudoomiyaha OYSU Pacific Mudane Ahmed Ayuub oo ugu horayn dadkii shirka ka soo qayb galay u mahad celiyay kana gudoomay soo dhawaynta & qalbiga wanaagsan ee lagu qaabilay, Mudane Ahmed Ayuub wuxuu ka warbixiyay guud ahaan hawlaha OYSU Pacific & dadaalka ay ugu jiraan xoojinta hawlaha halganka.

Mudane Ahmed Ayuub wuxuu dhalinta ku amaanay isku xidhka & feejignaata dheeriga ah ee ay marwalba la diyaarsanyihiin wuxuuna ku booriyay in ay sii kordhiyaan hawlaha ay umada Ogaadeenya ugu hiilinayaan, sidoo kale waxaa shirka ka hadlay qaar ka mid ah Maamulka & xubnaha OYSU Perth waxayna dhanaatood isku raaceen in la gaadhay xiligii OYSU halganka xaqa ah Ogaadeenya ka socda ay malkada ka saari lahaayeen si dhab ahna ay ciidda Ogaadeenya gumaysiga uga sifayn lahaayeen.

Shirka waxaa lagu falanqeeyay arimo badan oo aad muhiim u ah kuwaas oo dhamaantood qalinka lagu duugay hoostana laga xariiqay waxaana la isla qaatay in si hufan loo dardar galiyo shirarka & abaabulka guud ahaan OYSU Pacific gaar ahaan Perth oo ah xudunta & laf dhabarka OYSU Pacific.

Waxaa shirka laga soo saaray goáano dhaxal gal ah oo guud ahaan geedi socodka OYSU kor loogu qaadi doono sidoo kale shirka waxaa lagaga hadlay si kululna loo cambaareeyay guud ahaan falalka waxshinimada ah ee gumaysiga Itoobiya uu shacabka Ogaadeenya kula kaco.

Dhalinyarda OYSU ee Perth waxay si aad u culus u cabaareeyeen shir ku sheegii Miyir-Dabool ee baryahan Jigjiga ka socday laguna bahdilayay dad shacab ah oo lagu sameeay falal aad loonecbaysto oo meelka dhac ku ah diinta Islaamka ee sharafta badan, dhaqanka suuban ee umada Soomaalida Ogaadeenya ay hodanka ku tahay & xuquuda Insaaniga ah ee uu dhamaan caalamku wada qirsanyahay in ay laguma xadgudbaan tahayna la isla garwaaqsaday.

OYSU Perth waxay baaq u direen Urur weynaha OYSU & dhamaan Jaaliyadaha Soomalida Ogaadeenya waxayna ku adkeeyeen in si adag looga gilgisho falalka laga xumaado ee sida joogtada ah shacabka Ogaadeenya loogula kacayo laguna asal guurinayo karaamada & sharafka dadka Ogaadeenya, OYSU Perth waxay si weyn u cambaareeyeen shaqsiyaadka uu Abdi Iley (UBO) horjoogaha u yahay ee daba dhilifka ah iimaan & karaamona aan lahayn gumaysiga dhaqanka xuna isu duleeyay waxayna tilmaameen in aan la iloobi doonin ayna dhalinyaradu diiwaan galinayaan waxyeelooyinka & gabood falada aan loo dul qaadan karin ee ay shaqsiyaadka uu gumaysigu wakiishay hor muudka ka yihiin.

Sidoo kale OYSU Perth waxay baaq dheer u direen dhamaan Umada Soomaaliyeed, Hay,adaha xuquuqul Insaanka & guud ahaan wadaladaha caalamka waxayna ugu baaqeen in si dhab ah Itoobiya loola xisaabtamo laguna cadaadiyo in ay dhulka Ogaadeenya khuburo & saxaafada madaxa banaanu ogalaato.

Sidoo kale OYSU waxay si aad ah ugu mahad celiyeen Bahad saxaafada Ogaadeenya oo ay sheegeen in ay dadaal dheeraad ah sameeyeen soona bandhigeen tacadiyada shacabka Ogaadeenya loo gaysanayo indhaha caalamkana ku soo jiidiyeen isla markaasna ay sanadihii u dambeeyay horumar aan la yaraysan karin ku taaabsadeen.

Dhalintu waxay bahda saxaafada Ogaadeenya ku amaaneen soo bandhigida wararka xaqiiqada ku salaysan ee Ogaadeenya ka hor tagida & burburinta borobogaadhada gumaysiga, fashilinta qorsheyawga qarsoon ee gumaysigu shacabka Ogaadeenya u maleegayo.

Dhalintii shirkan isugu timid waxay bahada saxaafada Ogaadeenya ku booriyeen in la sii dardar galiyo korna loo sii qaado halganka dhanka saxaafda ah ee shacabka Ogaadeenya loogu hiilinayo iyagoo dhanka kalana sheegay in ay ka dhalinyaro ahaan ka qayb qaadanayaan difaaca & horumarinta dalka & dadka Ogaadeenya ee dhanka.

Isku soo wada duuboo kulankan oo ahaa mid xiiso badan ayna ka qayb galeen dhalinyaro aad u soofaysan ayaa guul ku soo gabagaboobay waxaana lagu balamay kulamo dambe oo kor loogu qaadayo tayada & garaadka da'yarta Soomalida Ogaadeenya ee Perth ku dhaqan kuwaas oo in la barbaariyo mudan si ay barito jiilasha dambe ay u barbaariyaan looguna aayo.

Qorahay Media
qorahay99@yahoo.com