Nov 30, 2012 (QOL)Wasiirka Arimaha Gudaha iyo Amniga qaranka Soomaaliya Mudane C/kariim
Xuseen Guuleed ayaa waxa uu maanta kaqayb galay kulan ka dhacay Magaalada Muqdisho isla markaasna looga hadlayay Arimo la xidhiidha Maamul u samaynta Gobolada Jubooyinka.

Warbaahinta afka Dowlada ku hadasha ee Radio Muqdisho ayaa sheegtay inay kulanka ka soo qaybgaleen Wasiiro, siyaasiyiin, salaadiin iyo waxgarad kale isla markaasna laga wada dooday qaabka Maamulka loogu samaynayo Gobolada Jubbooyinka, mid kamid ah dadkii kulanka ka hadlay oo aan magaciisa la shaacinin ayaa codsaday in ahmiyada lasiiyo sidii meel hoose looga soo bilaabi lahaa dhismaha Maamulka Gobolada isla markaasna hadii uu Urur goboleedka IGAD wax fududaynayo uu usoo maro Dowlada Soomaalieed oo iyadu ka masuul ah umadeeda, waa sida ay Radio Muqdisho sheegtaye.

Suldaan C/qaadir Lugadheere oo iska kulanka ka hadlay ayaa sheegay inay dadka Deegaanka Jubbooyinku xaq u leeyahiin Samaynta Maamulka Jubbaland loona baahan yahay in Dowladu arintaas ku gacan siiso.

Wasiirka Arimaha Gudaha iyo Amniga qaranka Soomaaliya Cabdikariim Xuseen Guuleed oo isna kulanka ka hadlay ayaa sheegay inay Dowladiisu dejisay Siyaasad guud oo ay ka damacsan tahay samaynta Maamulada gobolada dalka, iyadoo la raacayo Nidaamka Federaalka ah, wuxuuna intaas ku daray inaysan taas macnaheedu ahayn in Dowladu Maamul kor ka keenayso balse ay dadka deegaanku leeyahiin doorashada y Dowladuna ay sharciyaynayso.

Isku soowada uruuriyoo hadalka Wasiirka Arimaha Gudaha iyo Amniga qaranka Soomaaliya ayaa imaanaya iyadoo la rabo in Maamul rasmi ah loo sameeyo Gobolada Jubbooyinka oo inta badan laga saaray Kooxda
Alshabaab, balse aad loogu kala qaybsan yahay qaabka iyo wadada loo marayo maamulkaas Jubbaland.

Noor Mohamed
Qorahay Media
qorahay99@yahoo.com