FATXIYOW

Gabaygan waxaan u tiriyey, gaar aháán, wiil aan adeer u ahay oo la yidhaahdo Maxamed Maxamuud Cumar (Fatxi) oo markaa shan iyo toban jirsadey iyo, gùùd aháán, facaaddiisa Soomaaliyeed ee la da'da ah, oo aan hubo inay baahí weyn u qabaan talò iyo tusmò ay sààd uga dhigtaan Qarniga 21aad oo foodda ku soo haya.

Fa’da gabay adaan Muxamedow ` kuu furfurayaaye
inkastoo facaagii yaryahay ` waan ku fahamsiine
adigiyo filkaagaan fandhigid ` aan farteen bariye.

Fatxiyow xikmadò kuugu filan, berri-ku-faa`iidka
iyo faallò duniyeed intaan ` filayo toolmooni
fanuuska nuurkaan tilmáán ` kuugu falanqayne.

Tusmò fayllan anigoo fansaar ` kugu fanaynaaya
wààga foolka kugu soo hayiyo ` farabarkuu dooni
iyo furaha nololshaan qodbayn ` kuugu faaqidiye.

Farsamaynta Rabbigii lahaa ` faxallo-uunkeena
dháb inuu u jiro kay fureen ` nebiyaduu faafshey
fadligiisa bari gúúli waa ` tuu fidshoo gudha e.

Furqaan aamin Diinteena oo ` hayso faraqeeda
Mustafuhu dariiquu falood ` qun ugu foognaadto
iyo waa inaad fuliso tuu ` Eebbe faralyeelay.

Rabbi baa kurbada feydi kara ` oo furdaamiya e
qadderkiyo junuuddiisa faran ` ha ku fallaagoobin
faajirnimo ka dheerow cíd kale ` ferej inaad mooddo.

Dadkii hore fac weynuu lahaa ` iyo firgoyn dheere
fiinta sare haddiyo teenu waa ` toban kun oo fiide
maandhow cimriga soo fagmaa ` loo falaa tacabe.

Qaangaadh xil fuulaad tahaoo ` loo xisaab furaye
ifka ficiladii kuu qormaa ` faylka kuu geliye
fursad gaaban weeyee qabriga ` kayd u dhigo fiican.

Wiilyahow falaadyada adduun ` faalladeed badane
is-fasakha fusuul aan is-xigin ` isu faruurkeeda
waa lama filaan fira baxdiyo ` faalka oo kale e.

Farxad laguma waariyo wanaag ` fooqyadeed sare e
nabsi foorarshaa dhima midkii ` uu fasaad galo e
isku-fuuq fanqaadkeeda bilan ` fanaxa haw taagin.

Fool-adkaanta lagu sii yaqaan ` sebenka feylfeylan
xanuun lays faquuqiyo fakhriga ` fara-madhnaantiisa
samir qudha ayaa kaa furfura ‘ feleg cidhiidhyoone.

Dugsi weeye furanoo aqoon ` lagaga foolaaye
waa fagaare lagu soo arkaa ` fajac dhammaantiise
fidno weeye labadeeda qaar ` fawska loo maro e.

Rabbi baa fadilay aadmigoo ` siiyey fiirada e
xoolahaas la foofshiyo khalqiga ` fulaya ee daaqa
kama feedha weynee caqliga ` buu fardheeryahay e.

Garaadkii fiyow baa kasmada ` feyda oo hela e
fekredaha middaan garad hagayn ` foolka laga raacshey
ma fadhiisto ficilkii waxgarad ` lagala fiigaaye.

Hawl kastoo fudayd loo galaa ` way fashilantaaye
haysu feydin falal kaa tanweyn ` kuuma fulayaane
waxkastaba intii aadan falin ` fiiri cidhibtooda.

Far halkaad dhigaysiyo halkaad ` foolka ugu jeeddo
farmac laguma boodiyo durduro ` fededka buubaale
feejignaan oggow waa adduun ` faysha lays jaro e.

Hadday talo fiddoo faafto way ` fara-badnaataaye
faradhuubni bay kaa rabtaa ` xaajo firidhaaye
ha ka faagan tii ugu firroon ` farakuhaynteeda.

Fusuqiyo xumaantuba naftay ` farac wadaagaane
waa filim wax jiitee hawadu ` yaanay ku faruuran
ka fogow Ibleys falallowaan ` uun ka faaruqine.

Haka faanin weligaa miskiin ` ama fiqiir baahan
haku fiirin gaajadu midkay ` faganaysoo liita
la fadhiiso maatadu naftay ` fiic ka dhigaysaaye.

Fantadiyo addoomada intaa ` feedho-malaxaystay
Rabbaw keenay faalide ma jiro ` furuq qof doontaaye
inay laba-fidnow tahay oggow ` aadmi lagu fiirsho.

Fiicnida adduun waa intii aad fiyowdahay e
fadligiisa tuugoo hadduu ` Eebbe kuu fidiyo
u adeeg intii fuuqbaxduu ` shubanku fiiqaayo.

Firfircooni joogto ah dedaal ` fiicni iyo hawlkar
iyo dabci furnaan baa khalqiga ` deeqa oo fura e
yaanad keli finiinine dulqaad ` fadhdhi nin weyn yeelo.

Ceebta loogu fooldhaqo ayaa ` ruuxa fooldila e
wax fadeexa keeniyo bayuur ` jaaha ka fogayso
hayska fiiqin foolkii gubtaa ` yeesha furuqdhoone.

Beentu kuma fogaysoo ciyoon ` way fad-bururtaaye
waa fulay gabbaadkuu galaa ` faadhumaysiga e
xaq ku fara-adayg waa runtoo ` aad furtaa abide.

Faran-caabud weeyoo dhabcaal ` Eebbe ka fogaaye
iimaankaan fadhdhiyin baa qalbigu ` bixinta fuuraaye
faxalnimo oggow waa Jannada ` taad ku furataaye.

Rabbi bayna faray waalidkoo ` loo samaan falo e
fac markay yihiin ood barbaar ` faylan u ahaato
fatxi iyo Farduusaad ku heli ` hooyo faraxeede.

Qarnigii farsamadaad kacdoo ` aad filkiis tahaye
waa seben farshaxanoo tacliin ` lagaga foosaaye
fersed jaahil kuma yeelan karo ` fooska maanta ahe.

Fartaad qaaddo fahamkeedu waa ` fara-aqoontaaye
ferded idil cilmaa kuu fanayn ` fiin kastoo sare e
fasalkiyo duruustiyo oggow ` fara-ku-hayntooda.

Inkastoo qabiil fiday dalkii ` uu fadqalaleeyey
misna waa dad far-iyo-suul ahoo ` aan farqi lahayne
firka caymin karayaad tahee ` feker quruun yeelo.

Faddaraynta gaaladu waddiyo ` fiiso-qaxintoodu
waa dhaqan-faddaadayn horloo ` caamadii falaye
mar ha filan inuu fiicnidaa ` faranji qoondeeyo.

Maandhow funuuntaan dhigdhigay ` fasiriddaan raacshey
farta kuugu fiiqaye xaqii ` farraxa haw boodin
ha fudaydsan waanadu Fatxow ` waa farriin odaye.